Friday, November 16, 2007

မြန်မာနိုင်ငံနဲ့ အမျိုးသားပညာရေး

အမျိုးသားပညာရေးဆိုတာဟာ အဓိကကတော့ ကိုယ့်နိုင်ငံရဲ့လိုအပ်ချက်တွေနဲ့ ကိုက်ညီပြီး ကမ္ဘာလုံးဆိုင်ရာ တိုးတက်မှုဖြစ်စဉ်တွေကိုလည်း အမီလိုက်နိုင်တဲ့ ပညာရေးမျိုးဖြစ်ဖို့အတွက် အစိုးရက ကူညီ ကိုင်တွယ် ပေးတာပါပဲ။ ဒီနေရာမှာ ကိုယ့်နိုင်ငံရဲ့ လိုအပ်ချက်ဆိုတာမှာ ဘာသာစကား၊ အနုပညာ နဲ့ ယဉ်ကျေးမှု အစဉ်အလာ၊ ဘာသာရေး ဓလေ့ထုံးစံတွေကို သေသေချာချာ သိဖို့၊ ထိန်းသိမ်းဖို့ဆိုတာတွေ ပါကောင်း ပါနိုင်ပါ တယ်။ အဲဒီ အပြင် ကိုယ့်နိုင်ငံရဲ့ ဦးတည်ရာလမ်းကြောင်းပေါ် မူတည်ပြီးတော့လည်း ကလေးတွေရဲ့ ပညာရေး ကို ခေတ်နဲ့ အမီ လိုက်နိုင်အောင် ရေးဆွဲ ဖန်တီးကြရပါတယ်။

အမျိုးသားပညာရေးနဲ့ပတ်သက်ရင် သီးခြား ထီးတည်းနေလေ့ရှိပြီးတော့ ပညာရေးမှာ ခိုင်မာတဲ့ အခြေခံမူရှိပြီး သားလည်းဖြစ်တဲ့ အင်္ဂလန်နိုင်ငံတောင်မှပဲ ၁၈၀၀ခုနှစ်နောက်ပိုင်း၊ ဥရောပဘက်ခြမ်းမှာ အမျိုးသားပညာရေး ကို ဦးတည်လုပ်လာတဲ့ အခါမှာတော့ သူလည်း လိုက်ပြီး ပြောင်းလဲပြုပြင်ရေး လုပ်ရပါတော့တယ်။ အင်္ဂလန် အစိုးရ ပါလီမာန်က ၁၈၅၆ခုနှစ်လောက်မှာ အခြေခံပညာရေးအဆင့်ကို ၀င်ပြီး ကူညီ ပံ့ပိုးပေးလာပါတယ်။ အထူးသဖြင့် ၁၈၈၉မှာ ပညာရေးအကြံပေး ဘုတ်အဖွဲ့ ဖွဲ့ပြီး အခြေခံအဆင့်မြင့်တန်းတွေနဲ့ စက်မှုလက်မှု ပညာရေးတွေအတွက် ရှေ့ဆောင်လမ်းညွှန်မှုတွေ လုပ်လာရာကနေ အမျိုးသားပညာရေးဘက်ကို တဖြည်းဖြည်း တည်ဆောက်လာတာပါ။ အင်္ဂလန်နိုင်ငံပညာရေးရဲ့ ဦးတည်ချက်ကတော့ အခြေခံလူထုကို ပညာချစ်တတ်လာအောင် ပညာရေးကို စိတ်ဝင်စားလာအောင် အစိုးရက ကူညီပေးပြီး၊ တက္ကသိုလ်အဆင့် ရောက်ရင်တော့ တဦးချင်းစီရဲ့ ကိုယ်ပိုင်လွတ်လပ်ခွင့် နဲ့ သင်ယူခွင့်ကို အပြည့်အ၀ ပေးထားပါတယ်။

အမေရိကန်နိုင်ငံမှာဆိုလည်း မူလတန်းအဆင့်ှမှာကိုပဲ ကလေးတွေဟာ သူတို့နိုင်ငံနဲ့သက်ဆိုင်တဲ့ နိုင်ငံရေး၊ စီးပွားရေး၊ အုပ်ချုပ်ရေးဆိုင်ရာတွေကို အကြမ်းဖျဉ်းကနေစပြီး သင်ကြရပါပြီ။ ပြီးတော့ အမေရိကန်နိုင်ငံဟာ ပြည်ထောင်စုနိုင်ငံဖြစ်တဲ့အတွက် အခြေခံပညာမှာ သက်ဆိုင်ရာဒေသအလိုက် ကိုယ့်ဒေသနဲ့ပတ်သက်တဲ့ အချက်အလက်တွေနဲ့ အားသာချက် အားနည်းချက်တွေကို ပထ၀ီဝင်နိုင်ငံရေးအနေနဲ့ သင်ကြရပါတယ်။ ကျောင်းသားနဲ့ဆရာ အပြန်အလှန် ဆွေးနွေးဝေဖန်ရင်းကနေ ကျောင်းသားတွေဟာ ကိုယ့်နိုင်ငံရဲ့ လိုအပ်ချက် တွေကို သုံးသပ်နိုင်တဲ့ အလေ့အကျင့်တွေ ရသွားကြပါတယ်။ ဒါဟာ၊ အနည်းဆုံးတော့ သူ့နိုင်ငံအတွက် နိုင်ငံသားကောင်း ဖြစ်လာအောင် ပျိုးထောင်ပေးနိုင်တဲ့ ပညာရေးပါပဲ။

စင်္ကာပူနိုင်ငံကတော့ နည်းပညာ ဖွံ့ဖြိုးတိုးတက်မှုကြောင့် ကျောင်းသားတွေဟာ ရုပ်ဝတ္ထုပိုင်းမှာ အားကောင်း လာတာကြောင့် စိတ်ပိုင်းနဲ့ ကိုယ်ကျင့်တရားစွမ်းရည်ပိုင်းတွေမှာ အားနည်းလာမှာစိုးတဲ့အတွက် အစိုးရက ၂၀၀၅ခုနှစ် နောက်ပိုင်းကစပြီး အခြေခံပညာရေး ထဲမှာ သိပ္ပံနည်းပညာနဲ့အတူ Moral Education အဖြစ် ကိုယ်ကျင့်တရားဆိုင်ရာနဲ့ ရသဆိုင်ရာတွေကို အားပေးသင်ကြားဖို့ မူ ချမှတ်လိုက်ပါတယ်။ တချိန်တည်းမှာပဲ စင်္ကာပူနိုင်ငံဟာ သူတို့တိုင်းပြည်ကို နည်းပညာတိုင်းပြည်အဖြစ် ထူထောင်နေတာမို့လို့ ကျောင်းပညာရေးမှာ နည်းပညာပိုင်းကိုလည်း အစွမ်းကုန် အားပေးနေတာ တွေ့ရပါတယ်။ ဥပမာအဖြစ် ပြောပြရရင် စင်္ကာပူနိုင်ငံမှာ မူလတန်း Grade-4 အဆင့်က ကလေးဟာ စက်ရုပ်ရဲ့ ဖွဲ့စည်းပုံအကြောင်းတွေ၊ Computer Programming တွေ သင်နေရပါပြီ။ ဒါဟာ သူ့နိုင်ငံရဲ့ လိုအပ်ချက်အရ တည်ဆောက်ထားတဲ့ အမျိုးသား ပညာရေးပါပဲ။

မြန်မာနိုင်ငံရဲ့ အခြေခံပညာရေးမှာကတော့ ပြဌာန်းထားတဲ့ ဘာသာရပ်တော်တော်များများဟာ ၁၉၆၄ခုနှစ် ကတည်းက အတည်ပြုပြဌာန်းခဲ့တဲ့ သင်ရိုးတွေ ခေါင်းစဉ်တွေသာ ဖြစ်နေဆဲပါ။ တချို့သင်ခန်းစာတွေဟာ ခေတ်နဲ့ မလျော်ညီတော့တဲ့အပြင် လက်တွေ့လည်း အသုံးချလို့မရတော့တဲ့ သင်ခန်းစာတွေပါ။ အဲဒီအပြင် ပြဌာန်းစာတွေကို ဆန်းသစ်အောင် ပြင်ဆင်မွမ်းမံတာမျိုး တိုးချဲ့သင်ကြားတာမျိုးလည်း မရှိသေးပါဘူး။ နိုင်ငံအာဏာပိုင်နဲ့ ပညာရေးဝန်ကြီးဌာနက အိုင်တီပညာရေးလို့ ကြွေးကြော်ထားပေမဲ့ လက်တွေ့မှာတော့ နိုင်ငံရဲ့လိုအပ်ချက်နဲ့ ကိုက်ညီပြီး အိုင်တီခေတ်နဲ့ သင့်တော်တဲ့ သင်ရိုးတွေ သင်ခန်းစာတွေ အသစ် တိုးချဲ့ ရေးဆွဲတာ ပြင်ဆင်ရေးဆွဲတာတွေ မတွေ့ရပါဘူး။ အာဏာပိုင် အစိုးရကလည်း နိုင်ငံရေးဆန်ဆန် ၀င်ရောက် စွက်ဖက်တာမျိုးသာရှိပြီး၊ ပံ့ပိုးကူညီတာမျိုး မရှိတာကြောင့် အမျိုးသားပညာရေးစနစ် တည်ဆောက် နေတယ် လို့ မပြောနိုင်ပါဘူး။

ဒါ့အပြင် သတင်းအချက်အလက်နဲ့ နည်းပညာခေတ်မှာ မြန်မာနိုင်ငံက ကျောင်းသားတွေဟာ တကယ်စစ်မှန်တဲ့ သိသင့်သိထိုက်တဲ့ ကမ္ဘာ့အရေးတွေကို သိခွင့်မရတဲ့အပြင် ကိုယ့်နိုင်ငံရဲ့၊ ကိုယ့်ပြည်နယ် ကိုယ့်ဒေသရဲ့ မျက်မှောက် လက်ရှိအနေအထားကိုတောင်မှ အမှန်အတိုင်း သိခွင့်မရကြပါဘူး။ ဒါကြောင့် မြန်မာနိုင်ငံက ကျောင်းသားတွေဟာ ဗဟုသုတအရာမှာ အလွန် အားနည်းနေကြရတာ ဖြစ်ပါတယ်။ အထူးသဖြင့် မြန်မာ့သမိုင်းဘာသာရပ် ကမ္ဘာ့သမိုင်းဘာသာရပ်တွေမှာ အာဏာပိုင်တို့အလိုကျ အလွန်ရှေးကျတဲ့ သမိုင်းတွေ ကိုသာ သင်ယူနေကြရပြီးတော့ မျက်မှောက်ခေတ်နဲ့ နှိုင်းယှဉ်ပြီး သုံးသပ် ဆွေးနွေးစဉ်းစားရတာမျိုးတွေ မလုပ်ရတာကြောင့်လည်း ကျောင်းသားအများစုဟာ ဆင်ခြင်တွေးခေါ် နိုင်စွမ်းမှာပါ အားနည်းလာကြရပါတယ်။

ပိုဆိုးတာကတော့ ခုချိန်ထိ မြန်မာနိုင်ငံပညာရေးထဲမှာ မျက်မှောက်အိုင်တီခေတ်နဲ့ ကိုက်ညီတဲ့ သင်ရိုးတွေ ပြဋ္ဌာန်းစာတွေ မရှိသေးတာပဲ ဖြစ်ပါတယ်။ အဲဒီလို ခေတ်ကို ကိုယ်စားပြုနိုင်တဲ့စာတွေ မသင်ရတဲ့အပြင် ဘာသာရေးနဲ့ ယဉ်ကျေးမှုပိုင်းကို သင်ပြန်တော့လည်း တကယ့်တကယ် သင်ကြားပေးနေတဲ့ ဆုံးမစာတွေ နီတိတွေဟာ ကလေးတွေ လူငယ်တွေကို ငြိမ်ဝပ်ပိပြားနေအောင်၊ အမိန့်နာခံတတ်အောင် ပုံသွင်းတဲ့ အဆိုအမိန့်တွေသာ ဖြစ်နေပါတယ်။

ထိုင်းနိုင်ငံနဲ့ပဲ နှိုင်းယှဉ် ဥပမာပေးရရင် ထိုင်းနိုင်ငံဟာ ကျောင်းပညာရေးထဲမှာ သူတို့ရဲ့ ဘာသာရေး၊ ယဉ်ကျေးမှု ထုံးတမ်းစဉ်လာတွေနဲ့ ဘုရင်မင်းမြတ်နဲ့ သူ့မိသားစုတွေရဲ့ ကြီးကျယ်မြင့်မြတ်ပုံအကြောင်းတွေကို ထဲထဲဝင်ဝင် ထည့်သင်သလိုပဲ၊ ခေတ်မီ အိုင်တီနည်းပညာကိုလည်း တပါတည်း ပူးတွဲသင်ပေးနေတာမျိုး ရှိနေပါတယ်။ အဲဒီအပြင်၊ သူတို့နိုင်ငံရဲ့ စီးပွားရေး၊ နိုင်ငံရေး၊ အုပ်ချုပ်ရေးပုံစံတွေကိုလည်း ထည့်သင်ပေးတာ တွေ့ရပါတယ်။ အစိုးရအနေနဲ့လည်း Office of National Education Commission လို့ ဌာနတခု သီးသန့်ထားပြီး အမျိုးသားပညာရေးကို ထိထိရောက်ရောက် ဆောင်ရွက်နေပါတယ်။

တကယ်တော့ အမျိုးသားပညာရေးကို တိုးတက်အောင် တည်ဆောက်နေတဲ့ နိုင်ငံတိုင်းဟာ စာသင်သားတွေကို အနည်းဆုံးတော့ ကိုယ့်နိုင်ငံ ကိုယ့်ဒေသအကြောင်း တိတိကျကျ သေသေချာချာ သိထားရအောင် ပညာရေး ထဲမှာ ထည့်သွင်း သင်ကြားကြတာချည်းပါပဲ။ ဒါမှပဲ ကလေးတွေ လူငယ်တွေအနေနဲ့ တချိန်မှာ တိုင်းပြည်ကို ထိန်းသိမ်း အုပ်ချုပ်တဲ့အခါ ကျွမ်းကျွမ်းကျင်ကျင် ပိုင်ပိုင်နိုင်နိုင် ကိုင်တွယ် အုပ်ချုပ်နိုင်မှာ ဖြစ်ပါတယ်။

မေငြိမ်း (၂၀၀၇)




No comments: